Pas 50 vitesh toka do të mbulohet nga akullnajat

Nuk reshtin së befasuari, por edhe i fusin të dridhmat gjithë planetit
shkencëtarët rusë. Pasi shpalosën muajt e fundit planin e tyre për të
kolonizuar brenda 15 viteve Henën, por të rrëmbyer nga gjiri i saj
burimin magjik të energjisë "Helium 3", shkenca ruse shikon tashmë edhe
më larg sesa njëdhjetëvjeçar e gjysëm. Këtë radhë jo për të siguruar
një burim alternativ dhe ekologjik energjie siç është "Helium 3" që
flen ende në Hënë, por për të parashikuar në mënyrë shkencore se ç'do
të pësojë planeti ynë i përbashkët pas 50 vitesh. Pjesë e ekipit
shkencor të Observatorit Astronimik të Pulovës, institucion që varet
drejtpërdrejt nga Akademia e Shkencave të Federatës së Rusisë, Kabibulo
Abdusamatov është një shkencëtar atipik.
Sipas tij, "aty rrotull
gjysmës së shekullit XXI, Toka nuk do të kërcënohet aspak nga ngrohja
globale, siç mendojnë shumica e shkencëtarëve, por përkundrazi, nga
ftohja globle", shkruan e përditshmja ruse "Gazeta".
Ai i
mbështet pohimet e tij mbi një studim mbi ndryshimet ciklike të
aktivitetit diellor në një shtrirje afatgjatë. Kështu "përgjatë gjithë
shekullit XX rrezatimi i Diellit është rritur pak nga pak, ashtu si
edhe energjia e çliruar prej tij. Kjo energji aktualisht ka arritur
maksimumin e munshëm", nënvizon gazeta ruse. "Për këtë arsye ne do të
asistojmë në një rënie të aktivitetit diellor, dukuri që mund të
fillojë nga vitet 2012-2013 dhe do të vijojë deri në vitet 2035-2045.
Nuk përjashtohet aspak që pas rreth 15-20 vjetësh do të fillojë një
ftohje e ashpër e klimës", konkludon e përditshmja "Gazeta", duke iu
referuar studimit dhe parashikimit të shkencëtarit rus Abdusamatov.
Sipas
kësaj gazetë, vëzhgimet e uljes së aktivitetit diellor të realizuara
nga ky shkencëtar rus, konfirmohen edhe nga kolegët e tij amerikanë të
"Grupit të Fizikës së Diellit", pranë Institutit Teknologjik të Nju
Xhersit.
Megjithatë për momentin, sipas shumë meteorologëve dhe
klimatologëve, ngrohja klimaterike botërore vazhdon dhe madje do të
theksohet edhe më tej. Përfundimisht çështja e ndryshimeve klimaterike
botërore tashmë ka vënë në dy kampe teorish të kundërta pikëpamjet
shkencore: atë të ngrohjes dhe atë të ftohjes.
Ky ballafaqim
pikëpamjesh është shoqëruar dhe shoqërohet me akuza të ndërsjelljta
"për mbrojtjen e pozicioneve shkencore të caktuara në shërbim të
interesave të lobeve të mëdha financiare".
"Gazeta" citon edhe teza
të tjera mbi ftohjen klimaterike, por këtë herë jo në shkallë
planetare, popr vetëm në rrafshin europian. "Kjo ftohje do të ndodhë si
pasojë e humbjes së fuqisë së Gulf Stream-it, e vetmja rrymë oqeanike
që zbut klimën e Europës.
Nëse parashikimet e shkencëtarit rus
Kabibulo Abdusamatov do të jenë të sakta dhe do të verifikohen në
praktikë, atëherë njerëzimit i kanoset një rrezik i madh shfarosjeje
nga hipotermia jo shumë vonë, por në terma afatmesme. Të paktën
prognoza mbetet e zymtë, përveçse industria e ngrohjes dhe agronomia do
të gjejnë mundësi mbijetese për njerëzit, edhe në situatat akullnajore.
Përndryshe
pas disa dekadash planeti ynë do të ketë të vetmit banorë nga qeniet e
gjalla: eskimezët, arinjtë polarë dhe pinguinët...